Ba dunya tu bisi tiga bansa urang; keterubah ia urang ke ngemata ke pengawa urang bukai, lalu nadai ati deka nitih. Udah nya urang ke nitih ke singkang pejalai urang bukai. Urang ti ketiga, nya urang ke ngaga pengawa nyadi.
Ari ketiga-tiga bansa urang nya tadi, mayuh kitai, masuk enggau aku empu, ba bansa urang ke dua. Taja pia, urang ke mujur lalu kaya ba dunya tu datai ari urang bansa ke tiga. Ngambika chunto ia, Bill Gates ke ngaga perisian Microsoft, Mark Zuckenberg urang ke ngaga Facebook tauka JRR Tolkien urang ke ngaga buku Lord Of The Ring.
Lebuh maya besekula kelia, dalam runding aku semina deka sekula pandai udahnya ngajihka diterima dalam pengawa perintah. Kebuah pia, gawa enggau perintah tu lebih terjamin agi lalu kitai begaji sampai tuai. Tang diatu aku ngasai, 13 taun gawa dalam perintah, tajapan gaji niki ninting taun, tang dalam ati aku enda puas. Laban aku berati, enti kitai gawa enggau urang, bakani kati kitai rajin gawa, gaji tetap nyampau nya, sama enggau kaban kitai ke bukai. Diatu baru aku terundingka bansa urang jenis ke tiga, ianya urang ke ngaga pengawa nyadi.
Nya alai, blog tu digaga aku, dikena aku ngenang ke pengawa aku ke udah ngeluie umur 30 taun lalu mutus ati deka ngerintis jalai nuju pengidup ke beduit. Ari blog tu, ulih nyadika tanda pengingat aku, setiap kali dibaca, aku lalu ingat ke semaya ngagai diri empu ke deka nyadi urang ke ngaga pengawa nyadi.
0 comments: