No Money, No talk; ko jaku mensia kemayaaritu. Ka tama ke jamban pan kitai beguna ke duit. Ari nya kitai nemu duit tu nyadi ke tali seput urang ba dunya.
Penyampau duit ba siku-siku urang, nitihka pangkat dikemisi ia. Besai agi pangkat, mayuh agi gaji. Nya kebuah urang tuai kitai ngasuh kitai belajar tetinggi awakka bulih pangkat lalu begaji besai.
Taja pia, peda aku konsep gaji tu baka ratio munyi ko jaku ribai. Besai agi pangkat, sempama kapak, besai agi meh lebak ia. Pengujung ia, pemakai kitai enggau urang ke begaji mit, sama aja. Ngelaie ke kitai bisi makai nyamai, laban sekeda urang ke bisi pangkat, selalu diundang urang makai malam.
Pemesai gaji kitai, enda tau nyadi ke sukat urang nya beduit. Selalu ia, lebuh maya kitai terima gaji, kitai lalu ngandalka gaji kitai nya, lalu mai bala kaban kitai manggang tauka mai bini anak keluar meli perengka rumah ke ngasuh rindang.
Taja pia, uji kitai sama ngasai; tajapan kitai selalu beperindang lebuh maya terima gaji, tang nama kebuah enda lama udah nya kitai tusah ati baru ngenang gaji? Kebuah pia, laban gaji kitai tinggal mimit, lalu enti mimit, kitai nangi ka rangkang ngachuk mata. Reti ia, enti kitai nadai duit, kitai mupuk tusah ati.
Siti ari cara ngubat penyakit tusah ati nadai duit, ianya kitai mesti bisi simpanan dalam bank, lalu duit nya selalu dikenang kitai. Ati gaga baru. Nya alai asai aku, kitai mestika nukar cara kitai merindang ati kitai ngena duit. Enti suba, lebuh bisi duit kitai selalu deka merindang ke ati ngena chara bepanggang tauka meli kereban beperindang, diatu kitai nukar nya ngagai besimpan ka duit. Ngambika dudi ari ila, enti kitai udah nyimpan duit dalam bank, ati kitai lalu senang. Laban, tajapan nadai duit mayuh ba jari, tang kitai udah bisi duit dalam bank.
Mayuh agi duit dalam bank, senang agi dalam ati kitai.
